Fikmin Sunda : KEUR SI NYAI

Keur Si Nyai.jpg

Sorolok, laci lomari dibuka, gap kana kaén hideung, bréh batu ali watang kuningan. Lila Mang Karna mencrong éta ali, manéhna nyawang mangsa 15 taun katukang, écés kénéh caritaan bapana harita.

“Na, omat ieu ali ulah dipupusti, komo deui digugusti, musryik ngaranna. Ieu mah ali biasa, teu dieusi nanaon, da puguh abah anu nyieun jeung ngawatanganana, ngan tangtu aya gunana keur hidep.” Bapana harita cacarita.

“Enya, tangtu aya gunana ieu ali téh.” Gerentesna.

Ali diasupkeun kana saku, tuluy asup ka dapur, katémbong pamajikanana keur miringan kulub sampeu.

“Badé kamana Bah?” Ceu Ilah mencrong salakina.

“Abah aya perlu ka dayeuh.” Mang Karna negeskeun.

“Mumuluk heula atuh, bilih salatri…!” Ceuk pamajikanana.

“Keur si Nyai waé, bisi balik ngaji lapareun.” Manéhna némbalan, tuluy ngaléos.

Nepi dayeuh manéhna méngkol ka tukang batu ali, gék cingogo.

“Balanja batu Mang?” Ceuk nu dagang.

“Henteu Kang, justru rék ngajual, sugan payu.” Manéhna ngodok saku, tuluy némbongkeun alina.

“Eduuun, hadé kitu alina.” Jalma gigireunana ngajorowok, anu lianna ngilu melong kana alina.

“Black Opal éta mah Mang, dijual sabaraha?” Sora jalma tukangeunana.

“Lima ratus rébu lah, ku Kami dibeuli?” Cenahna deui.

“Tujuh satengah Mang..?” nu gigireun ngilu nawar.

Mang Karna olohok ningali jalma anu nalawar alina, tempat jadi réang. Manéhna cengkat, leng… titingalianana poék, bluk… kapiuhan.

Mang Karna lilir, tuluy ngilikan eusi rohangan, bréh tulisan Puskésmas Pasundan, batu ali geus euweuh, gap kana sakuna, kacabak aya amplop, tuluy dibuka.

“Mang punten teu diantosan, batu ali ku abdi digaleuh dua juta, hapunten ku abdi dikantun, biaya rumah sakit tos dilunasan ku abdi, bilih kirang, ieu nomer abdi…………” Eusi tulisan na keretas anu dipaké mungkus duit.

“Alhamdulillah Nyai, hidep bisa sakola deui.” Sorana ngageter.

 

Andi Rustandi Sunarya, 23 April 2015

 

Posted on September 28, 2016, in Carpon jeung Fikmin. Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: